UFO老早来过上海了
8月20日夜到9点钟快，民航飞行员对塔台讲，伊看到一只比月亮大几百倍的光团辣拉天浪向，越来越大，铺天盖地。第二天发觉，除脱上海，北京、山西等好几个地方侪看到了一模一样个老老大个勿明光团。搿记结棍，媒体闹翻天了。最后总算弄清爽了，根本脱外星人呒没关系，浑身勿搭界个。
有人讲上海有记载个UFO是1987年8月27日出现个，搿个就有眼瞎话三千了。实际浪向，辣拉明朝万历年间，有一只“珠光烛天”个疑似UFO就来到吴淞口了，搿桩事体记录辣《宝山县志》里向。民国辰光，1932年春夏之交个一个下半日四五点钟辰光，有一个叫陈刚个小朋友跟伊弟弟两家头，辣拉爱文义路小沙渡路口（现北京西路西康路口附近）白相辰光，看到天浪向有一枚“金针”慢慢叫飞过。搿日天看到“金针”人估计勿少，所以第二天《时报》还发了短消息，还像煞请专家解释讲是“天体”咾啥，当时可以算热点新闻了。1947年，有一个美国人叫肯尼斯·阿诺德开飞机看野眼，结果看到9只闪闪发光个飞行物，喔唷，难末天下大乱了，UFO飞到东、飞到西，索性环游全球了。7月18日《申报》用了《信不信由你 飞盘光临上海》做标题，报道了昨日早浪3点钟，先是一只后来有两只“飞盘”从法租界西区龙华上空飞过，看见“飞盘”个是夜里向睏勿着觉、起来看看夜景个一个意大利侨民。外国人看见个是啥“洋盘”，现在肯定搞勿清爽了。19日夜到，UFO又到江湾了，搿趟看到个人是美国合众社无线电报务员兼江湾无线电报务员范家康，搿个人素质蛮好，自家跑到江湾机场美军陆军空运站去调查，结果是美国人放到天浪向预测气象的气候气球，虚惊一场。8月2日下半天，UFO又来到浦东高桥了。《申报》形容讲“随风飘荡，跌落麦田”。一落下来，“轰动全镇”，勿过马上就戳穿西洋镜了，啥个物事啦，又是“高空测量器”，上面还有"USA"了。
立升最大个是1947年7月26日的《新夜报》，用《传遍全世界 急坏全人类 飞盘究竟是什么？》大标题，详细披露了UFO的来龙去脉，辣辣当时，应该讲是“创举”了。估计搿能兜了一圈侪明白了，UFO实际浪是上海滩个“常客”，一眼勿稀奇。